كيف توظف الشخص المناسب لصفحتك على الفيسبوك؟
في هذه التدوينة سأساعدك على اختيار الشخص المناسب لتضعه في المكان المناسب
كيف توظف الشخص المناسب لصفحتك على الفيسبوك؟
قبل كل اشي خلينا نتفق انه ما في حدا قادر على القيام بمهام السوشيال ميديا لحاله واذا انت اليوم بتبحث عن هيك شخص فصدقني انت الخسران وبدل ما توفر على حالك رح تخسر.
طيب شو اعمل؟
مش هاد السؤال اللي خطر ببالك؟
يا صديقي لو نروح على الاعدادات على صفحة الفيسبوك ونروح على قسم الأدوار رح تلاقي في عندك 5 مسميات معطيكياهم الفيسبوك وهم :
admin / editor / Moderator / Advertiser / Analyst
طيب شو وظيفة كل واحد؟
تعال احكيلك اليوم لحتى الايام الجاي تقدر توظف الشخص المناسب بالمكان المناسب
ال admin:
بقدر يعمل كل اشي بالصفحة (ونصيحة ما تخلي ولا حدا يحصل على هاد المنصب غيرك انت فقط لأنه لو نفكر فيها عمرك شفت أكتر من مدير تنفيذي بالشركة؟
حتى لو كنت بشراكة مع حدا كل واحد الو مهام محددة والمسؤول لشخص واحد فقط وبنصح تضيف اكتر من حساب الك للاحتياط
ال editor:
بيمتلك جميع صلاحيات المسؤول ما عدا ازالة المسؤولين من الصفحة والتحكم باعدادات الصفحة ومن أهم المهام اللي بيقوم فيها هي نشر وانشاء المحتوى للصفحة يعني بنقدر نحكي انه هو الشخص المسؤول عن انشاء محتوى الصفحة من جميع النواحي وبيقدر يعمل اعلانات ويحلل الصفحة ليشوف شو أفضل المحتوى
ال Moderator:
بنقدر نختصر الكلام ونقول انه هو موظف الدعم الفني وخدمة العملاء بحيث بيقدر يرد على التعليقات والرسائل وبيقدر يحذف ويحضر الناس من الصفحة المزعجين وبيقدر كمان يعمل الاعلانات ويشوف التحليلات ولكن ما بيقدر ينزل محتوى ولا يقوم بدور المحرر
ال Advertiser:
من الاسم مبين وهاي الوظيفة بنسلمها لقسم التسويق أو أي شخص رح يعمللنا اعلانات وما في داعي نعمله ادمن يكفي فقط يكون معلن ومن صلاحياته فقط انشاء الاعلانات وتحليل الصفحة ليراقب نتائج الحملات الاعلانية اللي عم يعملها وما الو أي قدرة على الرد على الرسائل أو حتى التعليقات ولا ينشر المحتوى
وآخر الشي ال Analyst:
هو الأقل قدرة على الوصول لخصائص الصفحة وما بيقدر يعمل اشي غير مشاهدة التحليلات للصفحة ويشوف تطويراتها ويقدر يشوف اسماء الناشرين للمحتوى فقط غير هيك ما عندو اي صلاحيات
وهلأ صار بإمكانك تعرف مين الشخص المناسب بالمكان المناسب ف يا ريت ما تشغل شخص واحد ويمسكلك كل اللي انذكر لأنو انت الوحيد الخسران
مجلة الأستاذة
